:: روحــانية قلب ::

Monday, October 22, 2007

:: Housemaid ::

السلام عليكم ورحمة الله وبركاته
موقف رمضاني من المواقف اللي وعدتكم فيها

قبل ما أقول الموقف في شغلات لازم تعرفونها قبل
من عشر سنوات نحضى بشغّاله اثيوبية صارت وحدة من أهل البيت
طبعها من طبعنا .. أخلاقها من أخلاقنا كل شي فيها يخلّي اللي حولينا يقول هذي بنتكم لوول

المهم هي كل سنتين تسافر شهرين لأهلها
وقبل ما تسافر جبنا شغاله اثيوبيه ثانية تتعلم منها اشوي وتساعدنا وقت ماتكون مسافرة
قعدت معاها اسبوعين وسافرت
وطول الشهرين ونحن نتعامل مع الشغالة الجديدة بالاشاره
هي كانت مسؤولة بس عن التنظيفات في البيت والطبخ كان موزع علي انا وامي واختي

خلال هالشهرين صادفنا مواقف كثيرة معاها
هي مسكينه طيبة بس اشوي غشيمه
وكنت اتعب معاها لين افهمها شو اللي نريده منها

نجي للمهم
اللي متابعني يعرف اني سافرت العمرة اول يوم بـ رمضان
وبنفس اليوم وصلت فيه شغالتنا القديمة
نحن قعدنا 5 ايام في مكة
كانت فترة كافية يتبادلون الأمور والمواقف اللي صارت طوال غيابها

بعد مارجعت من السفر
ونحن في المطبخ
أكلّم شغالتنا القديمة
أقولها ها شو قالت عنّا الشغالة طول هالشهرين
شو شافت مننا؟
عسى ماكرهتنا

قالت بالعكس
تمت طول الوقت تمدح فيني وتقول هذي كثييير طيبة
طول الوقت مقابلتني وتعلمني كيف اسوي هذا وهذاك
وماكنت افهم عليها وماكانت تعصب علي

الدنيا حيل ماوسعتني من الفرحة
ان انسانه فقيرة مثل شغالتنا تقول هالكلام عنّي
حدي استانست
حتى قلت لشغالتنا القديمة تسألها من باب الفضول
لو تزوجت بتجي تشتغل عندي
قالت اي ههههههههه

المغزى من القصة مو تشهير لي
المغزى من القصة الشعور اللي تشعر به لما تعامل انسان بطريقة حلوة
ويقول كلمتين حلوات في حقك

استغرب من الناس اللي تعامل الخدم بقسوة كأنهم مو بشر
واحتقر هالشخص بصراحة
يعني مو كفاية عليها مغتربة عن اهلها وعيالها
عشان لقمة العيش .. بعد تلقى مهانة ومذله عند اللي تشتغل عندهم

أنا أحب اكون صداقة معاهم
دايما اسألهم عن اهلهم وعيالهم
حتى دوم يراويني صور عيالهم ويحكولي عنهم
حتى اللعب معاهم ألعبه
ولما يكون في خاطرهم شي او ناقص عليهم شي
دايما يقولون لي
بحكم انهم بيستحون يطلبون أمي او بحكم الاحترام والهيبة لمدام البيت
وهذا شي كثير يسعدني

كأني فتحت حلجي وماسكرته
خل أقول مثل أخوي بابل
وبس عشان اسكر حلجي ههههههه

وبس



Posted by عيون الحب :: 2:20 PM :: 21 Comments:

Post a Comment

---------------------------------------