Post a Comment

Tuesday, October 16, 2007

السلام عليكم ورحمة الله وبركاته

كان ياماكان في قديم الزمان وفي سالف العصر والأوان لـ حتى كان
كان في بنت حلوة أمها ماتت وهي صغيرة وأبوها تزوج غيرها وعندها أختين بشعات
وهي أحلاهم .. وأم زوجها كانت شريرة وخلتها تروح للغابة تودي أكل لجدتها المريضة بـ ردائها الأحمر .. وهي في الطريق لقت تفاحة وكلتها وتسممت والأقزام ساعدوها وبعدين تزوجت الأمير وقهرت خواتها البشعات

!!! أووووه تعالوا أنا خبصت كم قصة
شو السالفة؟؟

إي صح نسيت أقولكم لأني اليوم رسميا أنا بدون عقل
بدون عقل !! انتي شو تقولين عيونوووووو
مو إنتوا مادريتوا شو صار معاي

الله يسلمكم هذا أنا مركبة تقويم وضريبة هالعلاج إني أخلع أسناني
ومو أي أسنان ياناس ضروس العقل
ومو بس ضرس ولا اثنين لا وحياتكم الأربع

أصلا هم مالحقوا يطلعون بالكامل .. في بعضهم بعدهم تحت اللثه
بس اللي صار إنه لو طلعوا كاملين راح يخربون علاج سنتين عالفاضي

جان أول عملية أسويها وأخلع فيها ضرسيني فوق وتحت في الجهة اليمين تاريخ
اكتوبر .. والحمدلله مرت على خير ما عورتني ولا حسيت بـ شي 6

والثانيين فوف وتحت في الجهة اليسرى اليوم تاريخ 16 اكتوبر وشفت الوييييييييل
حسيت عيوني بـ تطلع
اصلا قبل ما أروح حسيت إنهم بـ يعوروني لأني دوم لما ما يصير فيني شي للمرة الأولى
وما أتعب منه وأقعد أقول للكل إني ما تعبت مع إني أحمد الله كل ما أذكر السالفة
في المرة اللي بعدها لما أصاب بـ نفس العلّة أتألم وأتعب وووووو

يعني كأني أحسد نفسي بـ نفسي هذا وأنا أقول الحمدلله وماشاء الله
عالعموم الحمدلله مرت على خير والله سهّلها
بس حبيت أعطيكم خبر إني رسميا بلا عقل لوووووووووووول

المواقف اللي صارت لي في المرة الأولى خلع

:: 1 ::

اللي يعرف فتاة الحزن ويتابعها بـ يعرف إنها تعرضت لحادث زحلقة في المطبخ أدى إلى كسر فكّها وخيطولها إياه .. عاد أنا لما كلمتها ضحكت على صوتها بس ما كنت أعيب عليها من باب الطنازة بس لأن صوتها كان مخنوق كأنه من مغاره

فـ أنا لمّا رجعت من المستشفى وقلتلها إني حاطة قطنه في أسناني وأتكلم مثلها
اتصلت خصوصا بس عشان تعيّب وتضحك علي ولا بعد ما قالت لي حتى الحمدلله ع السلامة شفتوا الاتيكيت معاها اشلون >> اي أحسن خل يعرفونج ويضحكون عليج ههههههههه

:: 2 ::

كنت قاعدة أكتب عالكمبيوتر وأشوي أخوي جا عندي بيسولف
ولا أبوي من بعيد يقوله وخّر عن أختك وانتبه تقولها شي تراها بلا عقل اليوم هههههههه
وهذا وأنا نزلت جهة وحدة بس قلت عزا الله لو نزلت الجهة الثانية محد بيكلمني صدق لوول

:: 3 ::

اتصال من خالتي عزّمت فيه إنها تشتريلي لعبة أطفال ولااا بعد خيرتني أي لعبه أريد لوووووول .. عاد أنا طلبت منها الطبلة اللي فيها عصا وحبلين من الجهتين أهز الطبلة بالعصا تدق فيها الحبال مادري عرفتوها ولا لا لوووووووووووول ولقيت صورة لها للأسف
وكل هالتشّريط وماجابت لي شي لووووووووول .. تراها مب اللي فتحت مدونه عشان ما تطيحون فيها لا وحدة ثانية هههههههه

بصراحة كنت ناوية أصورلكم ضروسي وأحطها ولكن رأفة بقلوبكم ورحمة لأسنانكم ما حطيتها هههههههههههه
أصلها بشعه بشاعه مابعدها بشاعه ههههههههههههه

وهذي كل القصة
بس حبيت أنوه أني منذ اليوم لست مسؤولة عن أي تصرف غير لائق أو غير عقلاني منّي
هذا والله ولي التوفيق

Posted by عيون الحب :: 9:50 PM :: 18 Comments:

Post a Comment

---------------------------------------

Monday, October 15, 2007

:: دعـوة خاصة ::

انسانة عساني ما انحرم منها
ربيت على ايدها وخذيت منها طبايع كثيرة
طيبة القلب .. والحنان .. وحب الخير
وما أنكر إني خذيت منها الدم الحار والعصبية لوول

بس والله ان قلبها كبير ويسع الكل
هي قلبي اللي أشكي له
وعيني اللي أبكي بها

حبيت أرحّب فيها في عالم التدوين
خالتي حياج الله معانا في هالعالم الحلو
والله الله بالمواضيع السنعة مو تفشليني خخخ
ولا تقلديني أهم شي لوووووووووووول

http://dmoo3-al7anin.blogspot.com/

زوروها .. حبّوها .. بس ها إياني وإياكم تحبونها أكثر عنّي
ترى أحذف مدونتها >>> انا مسويتها ههههه

:ملاحظة

ترى ربيت على ايدها بس أمي بعد ماقصرت
فديتها تغار لما أشكي لخالتي وأخليها هههههه
تقول تشكين لخالتج وأنا أمج لووول
عساني ما انحرم منهن قولوا آمين

Posted by عيون الحب :: 6:40 PM :: 10 Comments:

Post a Comment

---------------------------------------

Thursday, October 11, 2007

:: فرحة العيد ::

:تحديث

لغاية في نفسي تم حذف موضوع

DeEp InSiDe 3Yo0oN

مع الاحتفاظ بـ جميع الردود

السموحة

السلام عليكم ورحمة الله وبركاته
شحالكم؟؟
والله وحشتوني فردا فردا

خلّص رمضان وعشت فيه أيام غير عن كل سنة
وجانا العيد وأقولكم مبارك عيدكم
وعساكم يارب من عوادته

بس لحظة
"انتوا تستشعرون هالجملة "عساكم من عوادة العيد
أو هالجملة "عساكم من عوادة رمضان .. أو الله يبلغنا رمضان كل سنة

فكرتوا فيها؟؟
هل فعلا راح نكون من عوادة رمضان ولا العيد ؟؟

قبل كنت أقولها ما كنت أفكر إنه ممكن يمر علينا رمضان
أو العيد السنة اللي عقبها وشخص مب موجود في حياتنا كنت أقولها و أنا مب مدركة لمعناها

حتى كنت دووم أقول ينعاد عليج وإنتي عروس
أو ينعاد عليك وانت معرس
ينعاد عليكم وعندكم طفل ووووو

بس ما كنت أفكر بأنه صدق هالانسان ممكن ما أشوفه عقب سنة
أو ممكن أنا نفسي ما أعيش للسنة اللي عقبها
متى حسيت بهالاحساس صدق
قبل سنة .. في رمضان العام بالتحديد

جدتي كانت عندنا بالبيت .. تفطرت وعقب الصلاة أسمعها تدعي من قلبها
"يارب عساني من عوادة رمضان" وعادتها كثيييير

في هاللحظة صدق استشعرت هالجملة وفكرت
لمّا نحن نقولها .. نقولها بس لأننا تعودنا عليها
ما نقولها لأننا صدق خايفين نموت وما ينعاد علينا هالشهر أو العيد مرة ثانية

صدق جدتي خلتني أتمعّن بـ هالعبارة وصدق تمنيت من قلبي
إنه رمضان ينعاد علي السنة الجاية وأنا بصحة وعافية
وجميع المسلمين والمسلمات والمؤمنين والمؤمنات

وكل عام وإنتوا بـ ألف خير
وينعاد عليكم إن شاء الله بصحة وعافية ومن غير ما تفقدون أحد
اشرايكم بـ نفنوف العيد الجديد مالي؟؟

::

::

:ملاحظة

السويس رول انتاجي أمس لأول مرة بمناسبة العيد

حياكم تفضلوا

(:

Posted by عيون الحب :: 8:30 PM :: 17 Comments:

Post a Comment

---------------------------------------