السلام عليكم ورحمة الله وبركاته
انتهى الشهر الكريم .. شهر الخير والمغفرة

هالشهر من هالسنه بالذات
أقدر أقول إنه رمضان كان علي غير عن كل مرة

عشت أكثر سنين حياتي الرمضانية في ساحة المدرسة أو الكلية
في كل سنه كنت أتمنى أعيش رمضان من غير جو دراسي
بـ سبب الضغوطات اللي كنت أواجهها وتمنعني من روحانية هالشهر الكريم

سنة 2006 كانت أول سنة لي قضيت رمضان بعيد عن الدراسة
أذكر أن الضغط اللي حسيت فيه سنة البكالريوس منعني من
إني أتدبّر عدل في القرآن وكان أول سؤال نسأله بينّا البين في الكلاس
ها بشري أي جزء وصلتي؟! والكل كان يبدأ شكاوي صعوبة الدراسة اللي منعتنا من القراءة

كان رمضان 2006 شيء كبير بالنسبة لي
الأمنيات اللي كنت أتمناها كل سنة وما أحققها في رمضان
الختمات اللي كنت ودي أختمها في كل رمضان وما أقدر عليها
العبادات اللي كان ودي استشعرها وأكثّر منها
كل هالأمور كان هدفي أحققها في هـ الرمضان الأول اللي قعدته في البيت

بس للأسف .. الهمّة كانت حيل كبيرة وقوية علي
بديت بـ قوّة وما تدرّجت .. ضغطت على عمري كثير
وهذا أكبر غلط يسويه الشخص لأنه مع الأيام يتلاشى وقد يموت
وانتهيت بـ إني ما ختمت غير ختمه واحدة وبديت في نص ختمه وماخلّصتها

تعلّمت من تجربتي قبل وما تمنيتها تتكرر هالرمضان
مجرد معرفتي إن رمضان بالنسبة لي إجازة من توطين (كورس تأهيل وظيفي)
خلاّني أنوي أعدّل غلطة العام لأني ما أضمن أحصّل فرصة مثل هذي مرة ثانية

خليني أقولكم شو كنت معتادة أسويه في رمضانات قبل
وشو صرت أسوي في هالرمضان

:: 1 ::

كنت معتادة أتابع على الأقل مسلسل أو اثنين في رمضان

وصرت ما أتابع ولا مسلسل (إلا آخر 6 حلقات من باب الحارة السبب أمي(

:: 2 ::

كنت معتادة أقرأ القرآن بسرعة من غير تدبّر لأختم أكثر من ختمه
صرت أقرأ القرآن بـ تمعّن أكثر وانتبهت لأمور كانت غايبة عن بالي

:: 3 ::

كنت أصلّي التراويح في الأيام الأولى من رمضان وأهملها في آخرها
صرت الحمدلله ما أطوف تراويح يوم واحد

:: 4 ::

كنت ما أقوم للسحور لأني الحمدلله ما أجوع أو أعطش
صرت أقوم حتى لو أشرب ماي بس عشان السنّة

:: 5 ::

كنت ما أقرأ شيء غير القرآن في رمضان
وصرت أقرأ مواضيع دينيه والله يجزي من كان السبب وفي ميزان حسناته إن شاء الله

:: 6 ::

كنت ما أصلّي السنن الرواتب ولا الشفع والوتر ولا قيام الليل
صرت أصلّيهم إبتداء من رمضان وبواظب عليهم دائما وأبدا إن شاء الله

:: 7 ::

كنت أروح السوق ولو مرة وحدة لأغراض العيد في رمضان
وصرت أشتري أغراض العيد قبل رمضان عشان ما أطلع السوق

:: 8 ::

كنت أضيّع وقتي بـ توافه الأمور
وصرت أحاسب نفسي على كل دقيقة شو سويت فيها وكيف ضاعت وليش؟

::
::

سبحان الله رمضان هذا كان بـالنسبة لي غيير من نواحي كثييرة
صارت فيه أمور وقصص وحكايا ماصارت لي من قبل أبد
عشت فيه يوم بـ يوم والحمدلله حسيت بـ طعمه غير عن كل سنه
يمكن لأن نيّتي كانت فيه غير واحساسي كان روحاني أكثر
الله أعلم

::
::

انتظروني مع قصصي الرمضانية الكثيييرة
الله يعينكم على سوالفي ما راح تخلص لوول