:: روحــانية قلب ::

Friday, June 23, 2006

:: أحاسيس متبلدة ::

في يوم كانت الطيبة رفيقتي في حلي وترحالي .. كانت الغالبة على تصرفاتي وأحكامي .. وقتها كان الكل حولي .. من حبايب وأصدقاء وخلان ووو .. كنت وقتها أحس بظلم كبير .. بقهر فظيع .. لإني كنت أتصرف تصرفات أنا ماكنت أريدها .. بس بحكم الطيبة اللي كانت فيني كنت أتصرف جي .. تعبت .. ومليت .. وكرهت نفسي

كنت أقول .. ماعليه يا عيون .. مأجورة .. اللي أساءلج تجزينه خير .. وكنت راضية بهالشي .. لين ما اكتشفت انه الناس قامت تستغل هالطيبة .. يتصرفون تصرفات تضايقني وعقب يستسمحون .. وأرضى .. دومهم يقولون عادي هذي عيون ما تزعل وعادي بسرعة بترضى ومن هالكلام

لين جا اليوم اللي كرهت فيه نفسي .. وقررت أقسى على نفسي قبل اللي حولي .. وبالفعل نجحت .. الكل لاحظ التغير .. وللأسف الكل قام يبعد .. ليش!! شو اللي صار!! هذا كله لأني ما عدت أرضخ للي هم يبونه ..وووو

نفسيا ارتحت .. حسيت اني قمت أعطي كل انسان في حياتي حقه .. اللي يستاهل أسامحه .. واللي احس باستغلاله أخليه على حاله .. لحظتها كنت مستانسة .. لاني كنت في حالة وسط .. مب طيبة ومب قاسية

بس وصلت للطامة الكبرى .. وصلت لمرحلة ما أتمناها في حياتي .. تماديت بقسوتي .. تماديت باحساسي .. لين ما صرت متبلدة بمشاعري .. ما عدت احس باللي حولي .. وصابني برووووووود في علاقاتي مع اللي حولي .. عادي تمر أيام وأسابيع من غير ما أكلمهم .. عادي ما أحس باحزانهم .. عادي ما اقدر اواسيهم لانه اصلا احساسهم ما وصلني

والحين للأسف .. أحس اني خسرتهم .. كلهم .. من أغلاهم .. لأعزهم

كيف أرجع مثل قبل؟؟ وكيف ما أرجع مثل قبل ؟؟

أريد أكون طيبة بس بنفس الوقت مب بزيادة .. وأريد أكون قاسية بس بعد في نفس الوقت مب بزيادة!! >> لغز لوول

Posted by عيون الحب :: 3:00 PM :: 18 Comments: